მანქანის მომზადება ზამთრისთვის: რა შევამოწმოთ წინასწარ

აცივებასთან ერთად საბურავებში წნევაც იკლებს. ამიტომ ზაფხულში გაზომილი მაჩვენებელი შემოდგომის ბოლოს შეიძლება უკვე შეცვლილი იყოს. წნევა ცივ საბურავებზე გაზომეთ და მანქანის მწარმოებლის რეკომენდაციას შეადარეთ — შესაბამისი ინფორმაცია, როგორც წესი, მძღოლის კართან მიკრულ სტიკერზე ან ავტომობილის სახელმძღვანელოში წერია.

ყველა მანქანისთვის ერთი და იგივე წნევა არ გამოდგება. საბურავის გვერდზე მითითებული მაქსიმალური მაჩვენებელიც თქვენი მანქანისთვის რეკომენდებულ წნევას არ ნიშნავს.

პროტექტორსა და გვერდებსაც დააკვირდით: ბზარები, ამობურცულობა ან არათანაბარი ცვეთა შემოწმების მიზეზია. არათანაბარი ცვეთისას ბორბლების გეომეტრია და სავალი ნაწილიც შესამოწმებელია. რაზვალის გასწორება უკვე გაცვეთილ საბურავს ვერ აღადგენს.

ზამთრის საბურავებზე პირველი თოვლის მოსვლამდე იფიქრეთ. არჩევისას გაითვალისწინეთ, სად და რა ამინდში მოგიწევთ სიარული — თბილისში ყოველდღიური მოძრაობა და თოვლიან მთის გზაზე მგზავრობა ერთნაირ პირობებს არ ნიშნავს.

დამუხრუჭებისას ახალი ხმა გაჩნდა? პედალზე ვიბრაციას გრძნობთ ან მანქანა სხვანაირად ჩერდება? მიზეზის გასარკვევად შემოწმება ღირს. მხოლოდ ხმით ვერ გაიგებთ, ხუნდებია შესაცვლელი, დისკია დაზიანებული თუ სხვა დეტალს სჭირდება ყურადღება.

სამუხრუჭე ხუნდებთან, ანუ „კალოდკებთან“, ერთად დისკებისა და სისტემის სხვა ნაწილების მდგომარეობაც უნდა შეფასდეს. სამუხრუჭე სითხის შეცვლის ვადასაც მწარმოებლის მითითება და შემოწმების შედეგი განსაზღვრავს.

თუ დამუხრუჭება აშკარად გაუარესდა ან პედალი მოულოდნელად ძალიან რბილი გახდა, სერვისამდე საკუთარი სვლით მისვლას ნუ ეცდებით — უსაფრთხო ადგილას გაჩერდით და დახმარება გამოიძახეთ.

ფარების შემოწმება მარტივია: ჩართეთ ახლო და შორი განათება, მოხვევის მაჩვენებლები და ავარიული სიგნალი. სამუხრუჭე შუქების შესამოწმებლად კი ვინმეს დახმარება სთხოვეთ. ჭუჭყიანი ფარები გაწმინდეთ და დააკვირდით, ორივე მხარე გამართულად მუშაობს თუ არა.

თუ ფარის გარე პლასტმასი გაყვითლებულია ან მისი ზედაპირი დაბურულია, შესაძლოა პოლირება იყოს საჭირო. ფარის შიგნით დაორთქვლას ან გაუმართავ ნათურას პოლირება ვერ მოაგვარებს — ასეთ დროს სხვა მიზეზია მოსაძებნი.

არასწორად მიმართული ფარების გასწორებაც მნიშვნელოვანია: გზას უნდა ხედავდეთ და შემხვედრი მძღოლიც არ უნდა დააბრმავოთ.

კონდიციონერი მხოლოდ ზაფხულში არ გამოგადგებათ — ის ჰაერიდან ტენის მოცილებაშიც გეხმარებათ. თუ საქარე მინა შიგნიდან იორთქლება, ჰაერი მინისკენ მიმართეთ და თქვენი მანქანის მინის გაშრობის რეჟიმი ჩართეთ. ბევრ ავტომობილში ამ დროს კონდიციონერიც ავტომატურად ირთვება.

თუ რეჟიმებს ხელით ირჩევთ, ჰაერის გარედან შემოსვლა სცადეთ. სალონში ერთი და იმავე ჰაერის მუდმივი ტრიალი მინების დაორთქვლას შეიძლება ხელს უწყობდეს. ზუსტი პარამეტრები თქვენი მანქანის სახელმძღვანელოში გადაამოწმეთ.

მინის საწმენდებიც გამოცადეთ. თუ მინაზე კვალს ტოვებს ან წყალს კარგად ვეღარ აშორებს, შეცვლის დროა. სარეცხი სითხეც მოსალოდნელ ტემპერატურას უნდა შეესაბამებოდეს. დაორთქლილი ან მოყინული მინით გზას ნუ გაუდგებით.

დილით სტარტერი ნელა ატრიალებს ძრავს? დაქოქვას რამდენიმე ცდა სჭირდება? სიცივეში აკუმულატორის სიმძლავრე მცირდება, თუმცა მიზეზი ყოველთვის მხოლოდ აკუმულატორი არ არის. შესამოწმებელი შეიძლება იყოს დამუხტვის სისტემა, კონტაქტები ან სხვა ელექტრული ნაწილი.

ხელოსანს უთხარით, როდის ჩნდება პრობლემა: მხოლოდ ცივ ძრავზე, რამდენიმე დღის გაჩერების შემდეგ თუ ყოველი დაქოქვისას. თუ დაფაზე გამაფრთხილებელი ინდიკატორიც ინთება, ესეც ახსენეთ. ასეთი დეტალები მიზეზის მოძებნას ამარტივებს და ზედმეტი ნაწილების შეცვლას აგარიდებთ.

ნახეთ, როდის შეიცვალა ძრავის ზეთი და ფილტრი. თუ შეცვლის ვადა ან გარბენი მოახლოვდა, ვიზიტი წინასწარ დაგეგმეთ. ზეთის სიბლანტე და სპეციფიკაცია მწარმოებლის მოთხოვნას უნდა შეესაბამებოდეს — მხოლოდ სეზონის შეცვლის გამო სხვა ზეთზე გადასვლა ყოველთვის საჭირო არ არის.

ანტიფრიზის მდგომარეობაც მნიშვნელოვანია. მარტო ფერით ვერ გაიგებთ, რამდენად გაუძლებს ანტიფრიზი ყინვას. თუ არ გახსოვთ, ბოლოს როდის შემოწმდა, ხელოსანს მისი მდგომარეობისა და გაყინვის ტემპერატურის შემოწმება სთხოვეთ. უცნობი ტიპის სითხეებს ერთმანეთში ნუ აურევთ და სანამ ძრავი ცხელია, გაგრილების სისტემის ავზის თავსახურს ნუ მოხსნით.

რით დაიწყოთ, თუ ყველაფრის ერთდროულად გაკეთებას ვერ ახერხებთ?

ჯერ იმ პრობლემებს მიხედეთ, რომლებიც დამუხრუჭებას, საბურავებსა და ხილვადობას ეხება. შემდეგ მოაგვარეთ დაქოქვის პრობლემა და გადაამოწმეთ ზეთისა და სხვა სითხეების შეცვლის ვადები. ხელოსანთან ჩამოწერილი კითხვებით მისვლა დაგეხმარებათ, საჭირო სამუშაო წინასწარ შეათანხმოთ.

GX Motors-ში შევამოწმებთ თქვენი მანქანის მუხრუჭებს, სავალ ნაწილსა და ბორბლების გეომეტრიას. ასევე გთავაზობთ ელექტროდიაგნოსტიკას, ზეთის შეცვლას, ფარების პოლირებასა და კონდიციონერის მომსახურებას. დაგვირეკეთ ნომერზე 555 11 77 71 და მოგვიყევით, რა გაწუხებთ. გელოდებით თბილისში, ნიკოლოზ ხუდადოვის 136-ში, ყოველდღე, 10:00–18:00.